DRAMATURGIYA KENGASHINING 2024-YILGI HISOBOT YIG‘ILISHI
2025-yilning 26-fevral kuni O‘zbekiston Yozuvchilar uyushmasida Dramaturgiya (teatr, kino va televideniye) kengashining 2024-yildagi faoliyati yakunlariga bag‘ishlangan yillik hisobot yig‘ilishi bo‘lib o‘tadi. Tadbirni kengash raisi Usmon Azim olib bordi. O‘zbekiston Yozuvchilar uyushmasi raisi o‘rinbosari G‘ayrat Majid yig‘ilishni ochib berdi.
Soha mutaxassislarining 2024-yilda teatr va kino sohasida amalga oshirilgan ijodiy-amaliy ishlar yuzasidan maʼruzalari tinglanadi va muhokama bo‘lib o‘tadi. Jumladan, O‘zbekiston teatrlarining o‘tgan yildagi ijodiy faoliyati mavzusida Sanʼatshunoslik fanlari bo‘yicha falsafa doktori (PhD), O‘zRFA Sanʼatshunoslik instituti katta ilmiy xodimi Shohrux Abdurasulov, 2024-yilda ishlangan o‘zbek badiiy filmlari xususida Sanʼatshunoslik fanlari bo‘yicha falsafa doktori (PhD), O‘zbekiston davlat sanʼat va madaniyat instituti o‘qituvchisi Muhayyo Muxtorova, Qo‘g‘irchoq teatrlarining 2024-yildagi ijodiy ishlari xususida O‘zRFA sanʼatshunoslik instituti doktoranti Malohat Turobovalar maʼruza qilishdi.
Maʼruzalardan kelib chiqib, zamonaviy dramaturgiya muammolari, kengashning ijodiy-tashkiliy masalalari, yoshlarni kengash faoliyatiga va ijodiy loyihalarga kengroq jalb etish masalalari muhokama etildi.
— Dramaturgiya kengashida o‘tgan 2024-yilda kelib tushgan qator pyesalarni ko‘rib chiqildi va taqrizlar taqdim etildi, — deydi kengash a'zosi Maftuna Muhammadaminova. — Jumladan, Shoyim Bo‘tayevning “Soxta afg‘on askari”, To‘ra Qobilning “Sahro hamisha uyg‘oq” dramalari, Karomat Dilmonovning “Afrosiyob”, Obidjon Ro‘ziboyevning “O‘rmon ertagi” nomli bolalar teatri uchun mo‘ljallangan pyesalari, Davron Rajabning “Urush” (shvetsiyalik dramaturg Lars Nuren asari) nomli drama tarjimasi ko‘rib chiqildi va yozma taqrizlar berildi.
2024-yilda kengash aʼzosi Qo‘chqor Norqobilning “Osmon hamma gapni eshitadi” nomli pyesasi Muqimiy teatrida, “Uydagi gap ko‘chada” komediyasi Qoraqalpoq davlat yosh tomoshabinlar teatrida, “Osmonning egasi bor” pyesasi Samarqand viloyati musiqali drama teatrida sahnalashtirildi.
Kengash aʼzosi Maftuna Muhammadaminova Absurd dramalari tarjimalarining 2 tomligigini nashrga tayyorladi. “Karkidon” nomli 1-jildi “Yangi asr avlodi” nashriyotida chop etildi. (2-jildi yaqin kunlarda chiqadi.)
O‘tgan 2024-yilda 30 iyun – Yoshlar kuni munosabati bilan yosh ssenariynavis Bobur Hamroyev O‘zbekiston Yozuvchilar uyushmasi aʼzoligiga qabul qilindi.
O‘zbekiston Kinematografiya agentligi eʼlon qilgan “Tirik tarix” badiiy va hujjatli filmlar uchun ssenariylar tanloviga kelib tushgan 40 dan ortiq sinopsislarni baholashda kengash aʼzolari ishtirok etdi va yozma ravishda xulosalar taqdim etildi.
O‘tgan yil davomida Madaniyat vazirligining teatr va dramaturgiya sohasini rivojlantirishga doir loyihalarini tayyorlashda Dramaturgiya kengashi aʼzolari hissasi katta bo‘ldi.
O‘zbekiston Yozuvchilar uyushmasi Dramaturgiya kengashi o‘tgan yil mobaynida respublikadagi teatrlarning yangi spektakllari muhokamalari, badiiy va hujjatli filmlar taqdimotlarida doimiy qatnashdi.
Yig‘ilish so‘ngida, kengashda 2025-yilda amalga oshirilishi lozim bo‘lgan ishlar muhokama qilinadi.
O‘zbekiston Yozuvchilar uyushmasi Axborot xizmati
