Geografiya fani o‘qituvchilaridan murojaat: bizni eshitadigan bormi?
2025-yilning 15-aprel kuni butun respublika bo‘yicha geografiya fani o‘qituvchilari uchun tashkil etilgan attestatsiya jarayoni yakunlandi.
Afsus bilan ta’kidlashimiz kerakki, bu sinovda ishtirok etgan biror bir o‘qituvchi ijobiy natijaga erisha olmadi. Bu holat faqatgina individual bilim va tayyorgarlik darajasiga bog‘liq emasligini, balki test materiallarining sifatiga oid muammolar mavjudligini ko‘rsatmoqda.
Quyidagi holatlar bizni chuqur tashvishga solmoqda:
1. Test savollarining mazmuni va shakli: Mutaxassislik fanidan berilgan savollar ko‘p hollarda mavhum, chalkash, turlicha talqin qilinadigan bo‘lib, aniq va tushunarli javob variantlariga ega emas edi.
2. Pedagogika fanidan test savollari: Juda uzun va murakkab tuzilgan bo‘lib, matnlar mantiqiy jihatdan tushunarsiz, chalkash ifodalangan.
3. Vizuallashtirishdagi texnik xatoliklar: Mutaxassislikka oid ayrim testlarda, xususan Venn diagrammasi, xaritalar, raqamlar va belgilar juda kichik, xira va aniqlikdan yiroq ko‘rinishda taqdim etilgan. Bu esa savolning mohiyatini to‘g‘ri anglashga jiddiy to‘sqinlik qildi.
Biz, geografiya fani fidoyi o‘qituvchilari sifatida, sifatli ta’lim berishga, zamonaviy yondashuvlarga asoslangan darslarni o‘tkazishga harakat qilayotgan bo‘lsak-da, bunday adolatsiz va texnik jihatdan pishiq tayyorlanmagan test sinovlari bizning kasbiy faoliyatimizga salbiy ta’sir ko‘rsatmoqda.
Shu sababli biz, butun respublika bo‘ylab faoliyat yuritayotgan geografiya o‘qituvchilari nomidan quyidagilarni so‘raymiz:
Attestatsiya testlari sifatini qayta ko‘rib chiqish, aniq, lo‘nda va mantiqiy tuzilgan savollar asosida tayyorlash;
Vizual materiallarning sifatiga jiddiy e’tibor berish;
Test sinovlarida adolat va shaffoflikni ta’minlash;
ushbu holat bo‘yicha xizmat tekshiruvini o‘tkazish hamda javobgar tashkilot yoki mutasaddilarning izoh berishini ta’minlash.
Maqsadimiz norozilik bildirish emas, balki ta’lim tizimimizning adolatli, shaffof va sifatli bo‘lishiga o‘z hissamizni qo‘shishdir.
Hurmat bilan,
Geografiya fani o‘qituvchilari nomidan Zulfiyaxon Samadova.
👉 @Kusherbayevga_murojaat
