Tasodiflar yo‘q bu dunyoda,
Uchrashmadik ikkimiz bekor.
Allohimning rejalarida,
Biz anglamas buyuk hikmat bor!
Sen qaydayu, men qayda edik,
Go‘yo Quyosh, go‘yo Oy, ayro.
Buni Alloh istamaganda,
Bo‘larmiding qarshimda paydo!
Duch kelmaydi daryoga daryo,
Qushlar sira ketmas to‘qnashib.
Borligimni bilgandek go‘yo,
Kelarmiding dovonlar oshib!
Charchagandim yo‘llaring kutib,
Muhabbatning ko‘zlari ojiz.
Mana endi bir lahza o‘tib,
Go‘yo eski tanishlardekmiz
Sen qismatga ishonasanmi,
Ko‘rganmisan meni qaydadir!
Bilsang buni mo‘jiza emas,
Taqdir derlar, azizim, taqdir!