🍎🏃📚✏️
گلوان
🍎 بیزیم بؤلگه ده (سولدوز-خانا) یولوندا بیر کند واردیر گلوان آدیندا. بو کند ۶۰ ایل بوندان اؤنجه تورک کندی ایدی آما ایندی بوتون تورکلر اورادان کؤچوب و اورا بیر کورد کندی اولوبدور. ایللر ایدی دوشونه جه ییمده منی اؤزونه دوموک ائتمیشدی هله ده کسینلیکله بیلمیرم بو آد نه آنلامدادیر بورایا دک اله گتیردیکلریمی سایین عالیم و معلم دوستوم معصوم محرمی جنابلاری سؤآلینین قاباغیندا پایلاشیرام. اولسون کی بیلنلر ده یاردیم ائدیب و بو سؤزجوکون دوغروسونو کسینلیکله هامی بیلسین. دئمک خوی شهرینده ایسه بو آددا سوْی آدلاری اولانلاردا واردیر و بیر خییاوان دا خوی شهرینده گوگل ده صفحه اوزه رینه گلیر.
کسینلیکه دئیه بیلمم گلوان ان اسکی چاغلاردان بری بو آدداایدی یوخسا بونا تای آدداایمیش؟ و گنه ده بیلمیرم هانسی عامیللره گؤره آدینین حرفلری دانیشیقلاردا و یازیلاردا نییه بیر بیری ایله توتوشمور. ویکی پئدیایا باخاندا، اینگیلیسی یازاندا گلوان آدی تاپیلمیر آما «کالوان» یازاندا دونیادا دؤرد آد اورتایا چیخیر. آشاغیداکیلار.
Kalvan, Alborz, Iran کالوان، البرز ایران
Kalvan, Markazi, Iran کالوان مرکزی ایران
Kalvan, West Azerbaijan, Iran کالوان آذربایجان غربی ایران
Kalwan, city in Maharashtra, India کالوان شهری در ماهاراشترا، هند
عرب الیفاسیندا کالوان یازاندا شهر آدلاری اوستده یازدیغیم کیمین صفحه یه گلمیر آما گلوان یازاندا ایرانین اوچ آوادانلیغی صفحه اوزه رینده گؤرونور. بونا گؤره آرخایینلیقلا دئمک اولار اینگیلیسجه ده کی کالوان ایرانداکی گلواندیر.
بئله لیکله کالوان یوخسا گلوان آددا دؤرد کند یوخسا شهر دونیادا بو لحظه واردیر.
آچیشدیرما
باتی آذربایجاندا West Azerbaijan سولدوز بؤلگه سینده بیر بیرینه یاخین اوچ کند واردیر :
۱-چییه نه کیتابلاردا و تابلولاردا هابئله دهخدا سؤزلوگونده ساختا حالدا چیانه یازیلیبدیر.
۲-قارنا
۳-گلوان
بو اوچ کند آدلاری باشقا آدلارا گؤره تانینمامیشدیلار. قارنا کندینی آچیقلاماسینی اوستاد دوکتور محمد اردمدن گؤتوروب قیساسی بئله دیر :
قارنا : آد. مغ. قارائوناس سؤزوندن. 1- باشقا طایفا ایله قاریشان طایفا. چیلخا و خالص اولمایان طایفا. 2- سولدوز ماحالیندا بیر کند آدی.
منجه چیلخا اولمایان طایفادان منظور اورانین ساکنلری چیلخا تورک یوخسا موغول دَییلمیشلر یادا اورادا یاشایان ائل قاتیشیق بیر ائل ایمیش. بو سؤز ایندییه یوخ ۷۰۰ ایل اؤنجه یه مربوط اولور یعنی موغول چاغی بورادا یاشایانلار چیلخا تورک یوخسا موغول دَییلمیشلر.
چییه نه: آد. ناغادئی یاخینلیغیندا بیر کند آدی. چاغداش شهره یاپیشماغینا گؤره ناغادئیین بیر مَحلله سی ساییلیر. بو سؤز چینگه نه (باخ) سؤزونون چئوریلمیشیدیر. باخ چینچاوات.
چینگه نه : آد. هیندیستاندان گلمیشلری سؤیله نن، دونیانین چوخ یئرینده یاشایان بیر توپلولوق. قاراچی. بیر الیندن ساتین
آلدیغیم چیچه یی/ وئردیم اؤته کی الینه چینگه نه قیزینین. تورکییه لی نئوزاد چلیک.
چیْنچاوات : هیند. آد. 1- هیندیستاندا ماهاراشترا ایالتینده اولان بیر شهر آدی. 2- هیندیستاندان گلمیش، ایراندا، تورکیه ده، عراقدا و باشقا یئرلرده یاشایان یوخسا یاشامیش کورد قاراچیلار.
اوسته قید ائتدیگیم ایکی کند موغول چاغیندان بو آددا تانینمیش و بئله گؤرونور ایچینده یاشایانلار موغول یوخسا تورک دَییلر اولسالار دا قاریشیقلاری وارایمیش.
گلوان کندینین آنلامین قارنا و چییه نه کندلرینه تای باخیشا آلساق و بو کندین آدینی هیند ده اولان گلوان لا بیر بیلسک یادا لاتین دیلینده کی کالوانی گلوان بیلسک بئله گؤرونور بو کندین آداملاری تورک یوخسا موغول یوخ بلکه گئچمیشلرده هیندیستاندان گلن آداملارایمیشلار و بو کندین آدینی اؤز دوغما شهرلرینین آدیجا چاغیریبدیلار یاداکی قونشولاری اونلاری گلدییی شهر آدییلا آدلاندیریبدیلار.
╭•••••••••••••••• ••••••••••••••••╮
╰➤@chgrmn
***
#تورکجه_یازاق
#تورکجه_یایقینلاشسین
#کیملیییمیز_قورونسون
╯••••••••••••••••••••••••••••••••╯
