Редакцияға келген хат!
Біз, “Қайсар” клубында жаттығып жүрген жасөспірім футболшылардың ата-аналары, сіздерге өзіміздің арызымызды жеткізгіміз келеді.
Менің ұлым 9 жылдан бері осы клубта футболмен айналысып келеді. Алайда, осы уақыт ішінде ТЕК БІР РЕТ қана толық спорттық жабдықпен қамтамасыз етілді.
Төрт жыл бұрын балаларымызға жартылай ғана форма берілді – бір форманы екі, тіпті үш бала кезектесіп киіп жүрді. Бұл жағдай біздің балаларымыздың психологиялық жағдайына да, олардың сырт келбетіне де әсер етіп отыр.
2025 жылдан бастап балаларымыз QJ League құрамында ел ішіндегі түрлі жарыстарға қатысып жүр. Жарыс кезіндегі жолақы, тұру және тамақтану шығындарын аталмыш лига өз мойнына алған. Бұл – барлық ата-анаға мәлім.
Сонда, Қызылорда облысының мәдениет және спорт саласына жауапты басшылығы қарапайым форма, спорттық киіммен қамтамасыз ете алмай ма?!
Басқа футбол клубтарының жас ойыншылары толық жабдықталған кезде, біздің балаларымыз сырт көзге өте ұят көрінеді. Бұл – ата-ана ретінде бізді де қатты қынжылтады.
Осы жылдар бойы біз, ата-аналар, қолдан келгенше балаларымызға өз қаражатымызға форма алып беріп келеміз. Арамызда әлеуметтік жағдайы төмен отбасылар да бар, бірақ соған қарамастан олар да тырысып жүр.
Бұл жағдай қашанға дейін жалғаса береді?
Біз бірнеше мәрте “Қайсар” футбол клубының басшылығына жүгіндік. Алайда үнемі бір ғана жауап аламыз – “Қаржы жоқ”.
Сонда спорт пен футболды дамыту үшін бөлінген миллиондаған қаржы қайда кетіп жатыр?
Мемлекет басшысы Қасым-Жомарт Кемелұлы Тоқаев өзінің халыққа Жолдауында балалар спортын, әсіресе футболды дамытуға ерекше назар аудару қажеттігін атап өтті.
Осыған орай, сіздерден:
– Балаларға толыққанды спорттық форма мен жабдықтармен қамтамасыз ету мәселесін шешуді
– Бұл бағытта нақты шаралар қабылдауды
– Қоғам алдындағы есепті ашық жүргізуді сұраймыз.
