Aholi va tadbirkorlar duch kelayotgan qator muammolar, xususan qurilish, ko‘p kvartirali uylarni boshqarish, tovarlarni import va eksportidagi byurokratik to‘siqlarni kamaytirish, davlat aktivlarini boshqarish, shuningdek, energetika, transport va boshqa davlat inspeksiyalari faoliyatidagi korrupsiyaviy holatlarni bartaraf etish bo‘yicha o‘rganishlar o‘tkazib, tegishli o‘zgarishlar bo‘yicha takliflarni ishlab chiqish ustida ishlashni boshladik.
Masalan, bugun ijtimoiy tarmoqlarda muhokama bo‘layotgan masala – ko‘p kvartirali uylarni boshqaruvchi kompaniyalar faoliyati bo‘yicha o‘rganish jarayonida, mazkur kompaniyalarni tanlashda mulkdorlar ishtiroki har doim ham ta’minlanmayotganligi, majburiy badallarni belgilashda qonunchilik talablariga rioya qilinmasligi kabi holatlar aniqlanmoqda.
Shuningdek, joylarda aholiga ichimlik suvini etkazish va sohada servis xizmatlarini ko‘rsatish borasidagi byurokratiya va korrupsiya xavflari o‘rganilmoqda - hisobotlarda chiroyli ko'ringan, ammo amalda yakunlanmagan loyihalar bor.
Korrupsiyaga qarshi kurashishda, odamlarimizni tashvishlantirayotgan muammolarga echim topishda, Prezidentimiz ta'kidlaganidek, barchamiz yagona kuch bo'lib harakat qilsak, albatta ijobiy natijalarga erishamiz!
Bobur Bekmurodov
Oliy Majlis Qonunchilik palatasi deputati
