Сёння за кратамі спаўняецца 52 гады Анджэю Пачобуту
Палітзняволены гродзенскі журналіст і сябра Саюза палякаў Беларусі Анджэй Пачобут сёння сустракае свой дзень народзінаў у зняволенні — яму спаўняецца 52 гады.
Нарадзіўся 16 красавіка 1973 года ў гарадскім пасёлку 🐿 Вялікая Бераставіца Гродзенскай вобласці.
У журналістыку прыйшоў у 2002 годзе. Працаваў у шэрагу незалежных гродзенскіх выданняў: «Пагоня», «Дзень», «Мясцовы час», рэспубліканскай газеце «Народная воля», а таксама ў польскамоўных выданнях Саюза палякаў Беларусі — «Głos znad Niemna» і «Magazyn Polski na uchodźstwie». Быў карэспандэнтам вядомага польскага выдання Gazeta Wyborcza. Асвятляў тэмы, звязаныя з дзейнасцю савецкіх спецслужбаў, антысавецкім супрацівам на Заходняй Беларусі, гісторыяй Арміі Краёвай.
За артыкул пра напад СССР на Польшчу ў верасні 1939-га Пачобута абвінавацілі ў «распальванні варожасці па нацыянальнай прыкмеце». У матэрыялах справы таксама згадваліся яго публікацыі пра становішча польскай меншасці ў Беларусі, падаўленне пратэстаў 2020 года і артыкул 2006 года пра аднаго з камандзіраў польскага антысавецкага падполля на Гродзеншчыне.
У 2023 годзе яго асудзілі на 8 гадоў калоніі.
Цяпер Анджэй Пачобут адбывае тэрмін у Наваполацкай калоніі № 1. Паводле наяўных звестак, на яго аказваецца пастаянны ціск, апошнім часам ён утрымліваецца ў памяшканні камернага тыпу (ПКТ).
✉️ Адрас для лістоў падтрымкі:
ПК №1, 211440, г. Наваполацк, вул. Тэхнічная, 8
Андрэй Станіслававіч Пачобут
