أنا المُستمع وعقلي هو المُتحدِّث ما نعرفش كيف وصلنا لهالنقطة، لكنّا قاعدين في صراع ما يسكت، ما يهدا، ما يحنّ.
عقلي يحكي، يحلل، يربط، يفكك، يبني ويهدّ. يعطيني مية سيناريو، وكل سيناريو أقسى من اللي قبله
يقولي: لو كنت تصرّفت هكي، لو قلت هذي وما قلت هذيك، لو مشيت، لو رجعت، لو تغيّرت..." كلامه ما يسكتش، ما يرحمش.
وأنا؟ أنا المُستمع ننصت، نتوه، نطيح في دوّامة التفكير اللي ما فيها قرار، اللي ما فيها نهاية. نحاول نسكّته، لكنّه أقوى، أنشط، أسرع. حتى في صمتي، صوته يعلى، يدوّي في راسي كأنّه طبل حرب.
أحياناً نتصوّر روحي جالس في ظلام، وعقلي قدامي يحمل فانوس، لكنّه بدل ما ينور طريقي، يسلّط الضي عليا، يخلّيني نشوف كل شي فيا واضح... حتى اللي ما نبيش نشوفه.
يقولي: شوف روحك كيف؟ وين كنت؟ وين وصلت؟" ويزيد يضحك بسخرية "توا بتستسلم؟".
الصراع هذا ما عنده هدنة مرات نخمّم نهرب، لكن وين نهرب من حاجة ساكنة فيّا؟ وين نهرب من صوتي اللي ما ينسكتش؟
لكن في لحظة، وسط الزحمة اللي في راسي، نقرر نغيّر اللعبة نوقف، ناخذ نفس، ونقول: "ما عادش ناخذ كل كلمة تقولها يا عقلي وكأنها حكم إعدام. أنت تتكلم، وأنا بنسمع...
لكن مش كل شي تقوله لازم نصدقه."
يمكن الصراع ما يوقفش، لكن نقدر نتحكّم في قوته نقدر نقرر متى ننصت، ومتى نحط الصمت سيد المكان
