Оноҕос кыырайа көтөр ырааҕар
Олохтоохтор успуортка ситиһиилэрэ барыта “Манчаары оонньууларыгар” туһуланар. Биир оннук холобуру, Орел куоракка ыытыллыбыт ох саанан ытыы турнирыгар чаҕылхай кыайыыны ситиспит, Ульяна Чупрова көрдөрдө. Ульяна Романовна дэгиттэр киһи, кини- кэрэ куоластаах ырыаһыт, иистэнньэҥ, ыспарсымыан уонна бэйэ дьыалатын тэриммит улууспут биир урбаанньыта буолар.
Бүгүн, Арассыыйа ааттаахтарын баһыйбыт биир дойдулаахпытын, Ульяна Чупрованы, тириэнэр Галина Павлованы, улуус баһылыгын э.т Руслан Захаров, баһылыгы соц. боппуруостарга солб. Святослав Сунхалыров, успуорт салайааччыта Андрей Сидоров, дьахтар сэбиэтэ Варвара Будикина, бииргэ төрөөбүт убайа Петр Чупров, уопсастыбанньыктар чиэстээтилэр. Руслан Игнатьевич, салайааччылар үрдүк ситиһиитинэн эҕэрдэлээн туран, кыайыылар кэлэ туралларыгар, “Манчаары оонньууларыгар” сүүмэрдэммит хамаандаҕа киирэн, ситиһии биир кыната буоларыгар баҕардылар. Маныаха, Ульяна Романовна, "Арассыыйа таһымнаах күрэхтэһиигэ сүрэхтэнним. Ытар тиэхиникэбин сэҥээрдилэр, хайҕаатылар. Сарсын саҥа күрэхтэһии суола ыҥырар" диэн харда тылы эттэ. Тириэнэр Галина Лукинична "Улям кытаанах хараахтардаах, ол сыалы ситиһэргэ көдьүүһү, кыаҕы биэрэр" диэн түмүктээтэ.
Успуорт киһини угуйар уонна бэйэтигэр тардар күүстээх. Манна таба тайаныы эмиэ оруолу ылар. Ульяна ох саанан ытыынан дьарыктаммыта үһүс сыла. Бастаан блочнай саанан ытыынан дьарыктаммыт. Бу көрүҥ кыыспытын тута бэйэтигэр тардан, үс ый иһинэн маастарга хандьыдаат нуорматын толорор. Онтон оҕунан төрүт ытыыга көһөн, иккис сылын күүскэ дьарыктанар. Үс ый иһигэр улууска, өрөспүүбүлүкэҕэ бириистээх миэстэлэри, уһуктаах оноҕоһунан ытыыга өрөспүүбүлүкэ чөмпүйэнээтигэр үһүс, туһааннаах күрэхтэһиилэргэ икки төгүл чөмпүйүөн аатын ылары ситистэ. Ый саҥатыгар, оэ олунньу 4-6 күннэригэр, Орел куоракка Арассыыйа кубогар чөмпүйүөннээтэ. Бу успуорт улахан түһүлгэтигэр Саха сириттэн барыта 36-та ыспарсымыан, кыттыыны ылбыта. Биһиги Ульянабыт мас саанан кыҥыыра суох көрүҥҥэ кыһыл көмүһү ылан, бүттүүн өрөспүүбүлүкэни, дойдун дьонун таатталары улаханнык үөртэ. Ситиһии мээнэҕэ кэлбэтэ биллэр, манна тириэнэр Галина Павлова дьарыга, ыйыыта-кэрдиитэ, ыспарсымыаҥҥа тутаах күүс-өйөбүл, санаа буолар.
Кыраҕы харахтаах, кытаанах тарбахтаах биир дойдулаахпыт Ульяна Чупрова, инникитин да кыайыы үрдүктэн-үрдүк чыпчаалыгар тахсан, биһигини үөрдүө-көтүтүө диэн эрэллээхпит.
