Қонысбай аға 1962 жылы Қалпақстан топырағында дүниеге келген. Әке тәрбиесін бойына сіңіріп өскен ол, жастайынан еңбекке етене жақын болып өсті. Орта мектепті тәмамдаған соң, Воронеж қаласынан электрик мамандығын игеріп, туған жеріндегі компрессорлық станцияда еңбек жолын бастады. Бұл – өндірістегі алғашқы қадамы еді. Ізденіске құштар жас жігіт сол жерде жүріп, қосымша дәнекерлеуші мамандығын да меңгеріп, техника мен темірдің тілін жетік түсінетін білікті маманға айналды.
Уақыт өте келе, өмір оны Маңғыстауға жетеледі. 1984 жылы отбасымен бірге қасиетті түбекке табан тіреп, мұнайлы өлкеде жаңа өмір бастады. Сол жылы-ақ МУРБ мекемесіне жұмысқа орналасып, дәнекерлеуші ретінде еңбекке араласты. Бұл кезең – еліміз үшін де, өндіріс үшін де өтпелі, ауыр уақыт болатын. Зауыт жабылып, жұмыс тоқтаған шақта Қонысбай аға шопыр болып, адал еңбектің қандай болсын түрінен қашпай, маңдай терін сүртпей жұмыс істей берді.
1995 жылы «Маңғыстаумұнайгаз» компаниясына қарасты Қаламқас кен орнындағы №1 мұнай-газ өндіру цехына слесарь болып қабылданады. Ізінше 2-цехқа ауысып, дәнекерлеуші ретінде жұмысын жалғастырады. Қарапайым ғана жұмыс емес – мұнай өндірісінің жүрегі саналатын ауыр, жауапты салада тер төкті. Әр түйін, әр қысым, әр тетік – оның алақаны мен назарынан өтіп жатты.
1998 жылы өндірістік жолы тағы бір жаңа белеске көтеріліп, газ цехына машинист болып ауысады. Сол сәттен бастап бүгінгі күнге дейін адал еңбек етіп келеді. Қонысбай ағаның 30 жылдан асқан еңбек өтілі – тек санның ғана көрсеткіші емес, ол – тұтас бір дәуірдің шежіресі.
Өндірістегі әрбір күні – термен суарылған, әріптес жүректермен бірге соққан күндер. Жас мамандарға бағыт беріп, салиқалы ақылын айтудан шаршамаған, әр ісіне ұқыптылықпен қарайтын Қонысбай Өтегенұлы – ұжымының құрметтісі, ұрпағының мақтанышы.
Бүгін, еңбектен зейнетке аяқ басқан осы бір ардақты азаматтың өмір жолына көз салсақ – біз тек еңбеккерді ғана емес, өмірдің өзіне адал болған адамды көреміз. Оның өнегелі жолы – кейінгі ұрпаққа қалған қазына.
Зейнет – тынығу емес, өткен жылдарға шүкіршілік айтып, артта қалған ізге көз тастау. Сол іздің айқын, жарқын болғаны қандай ғанибет!
#еңбектен_зейнетке #еңбекадамы
