O‘zbekiston tashqi ishlar vaziri boshchiligidagi mamlakatimiz delegatsiyasining Kuvaytga amalga oshirgan tashrifi samarali bo‘lib, yurtimiz va mintaqamiz manfaatlarini ilgari surishga qaratilgan qator kelishuvlarga boy bo‘ldi.
“Markaziy Osiyo – Ko‘rfaz arab davlatlari hamkorlik kengashi” Strategik muloqoti tashqi ishlar vazirlarining uchinchi uchrashuvida TIV rahbari hamkasblari bilan atroflicha muzokaralar olib bordi, aniq tashabbuslar bo‘yicha fikrlar almashdi, 5-may kuni Samarqand shahrida bo‘lib o‘tadigan Oliy darajadagi Sammitga tayyorgarlik masalalarini ko‘rib chiqdi.
Shuningdek, vazir O‘zbekiston Prezidenti Shavkat Mirziyoyev Janobi Oliylarining Kuvayt Davlati Amiri Shayx Mish’al as-Saboh A’lo Hazratlari va Valiahdi Shayx Saboh as-Saboh Hazrati Oliylariga eng samimiy salomlarini yetkazib, barcha sohalarda o‘zaro manfaatli hamkorlik uchun bor imkoniyatlar ishlatilishini ta’kidladi.
Bundan tashqari, Kuvaytning turli tashkilotlari rahbarlari, Markaziy Osiyo va Ko‘rfaz mamlakatlari tashqi ishlar vazirlari bilan alohida uchrashuvlar o‘tkazildi. Asosiy urg‘u iqtisodiy hamkorlikda erishilmagan ulkan salohiyatni birgalikda amalga oshirishga qaratildi.
Ushbu tashrif O‘zbekiston va Kuvayt o‘rtasidagi siyosiy, iqtisodiy va strategik munosabatlarni chuqurlashtirishga qaratilgan intilishni hamda hozirgi kunda global o‘zgarishlar, geosiyosiy murakkab jarayonlar va yangi tahdidlar davrida mintaqalarimizning o‘zaro yaqinlashuvi nafaqat tabiiy, balki strategik zaruratga aylanayotganligini ko‘rsatdi.
@TIVmatbuot
