Сергей Софронов: “Чемпионат сүрүн сыалынан бу сайын Таатта улууһугар ыытыллар Манчаары оонньууларыгар кыттар быраабы ылар путевкалары былдьаһыы буолар. Бу чемпионат кэнниттэн кулун тутарга ыытыллар күрэхтэһиигэ эмиэ путевкалар оонньонуохтара. Биһиги сыалбыт-сорукпут диэн, төһө кыалларынан, элбэх путевканы ылыы буолар. Нам улууһуттан 31 мадьыны кыттар.
Хамаандабыт күрэхтэһии буолар спортсаалатыттан чугас толору усулуобуйалаах оскуолаҕа олорор. Биһигини оскуола директора Игнатьев Михаил Сидорович, Чурапчы улууһун спорт управлениетын өр сылларга салайан кэлбит киһи, кыһанан арыаллыыр. Аһылыгынан хааччыллыыбыт олус үчүгэй, дьиэ аһылыгын курдук минньигэс, тотоойу.
Бэҕэһээ спортсменнарбыт бары этэҥҥэ ыйааһыннаныыны ааспыттара. Бүгүн 17 спортсмеммыт күрэхтэспититтэн 70, 80, 125 кг эр дьоҥҥо, 60, 75, +85 кг дьахталларга, бэтэрээннэргэ 65 кг, уопсайа, быһа барыллаан, 7 путевканы ылары ситистибит. Боротокуоллар официальнайдык тахса иликтэр. Дьиҥнээх түмүктэр сарсын сарсыарда биллиэхтэрэ.
60 кг чөмпүйүөннээбит Нам улууһуттан төрүттээх Ирина Алексеева билигин Горнайдааҕы ойуур хаһаайыстыбатын салайар, Республикаҕа биир тарбахха баттанар мадьынынан биллэр. Горнайга ыытыллыбыт Манчаары спартакиадатыгар бэйэтин ыйааһыныгар бастаабыта.
Улууспут мас тардыһыыга федерациятын салайааччыта Петр Эверстов бэйэтинэн кэлэн күүс-көмө, өйөбүл буола сылдьар, кэпсэтиилэри ыытар. Ону сэргэ Иван Васильевич Яковлев, Роман Заровняев, Семен Бурнашев, Елена Оконешникова курдук дьоммут кэлэн үлэлэһэ сылдьаллар. Бүгүн сарсыардаттан киэһэ хойукка, күрэхтэһии бүтүөр диэри, сынньалаҥа суох үлэлээтилэр.
Бүгүн күрэхтэспиттэр үксүлэрэ Намнаатылар. Ол оннугар сарсын киирсиэхтээх мадьыныларбыт айаннаан кэллилэр. Эбиэттэн киэһэ 3 чаастан 5 чааска диэри ыйааһыннаныыны этэҥҥэ аастылар.
Сарсын 14 мадьыныбыт кыттыахтаах. Эр дьоҥҥо - 65, 75, 90, 105 уонна +125 кг, дьахталларга - 55, 65, 85 кг уонна бэтэрээн эр дьоҥҥо 75, 95, кг путевкалары былдьаһыахпыт. Эр дьоҥҥо – 10 путевка, дьахталларга уонна бэтэрээн эр дьоҥҥо -6-лыы путевка иһин киирсиһии барыаҕа.
Чурапчы улууһун өттүттэн тэрээһин олус үчүгэй, көрөөччү элбэх. Сарсыҥҥы күрэхтэһиигэ эрэллээхпит. Атын улуустар эмиэ күүскэ бэлэмнэнэн кэлбиттэр. Холобура, хаҥаластар, мэҥэ хаҥаластар 35-тии, Таата улууһа 2 хамаанда тэринэн уопсайа 50-тан тахса спортсменнаахтар. Хамаандалар бары толору састааптаахтар”.
Сарсын сарсыарда күрэхтэһии официальнай боротокуола таҕыстаҕына, эбии иһитиннэрии оҥоруохпут.
"Нам улууһа" МТ пресс-сулууспата
