MOJOR-VENGERLAR BEKORGA OʻZLARINI TURKIY QAVM DEB BILMAYDI!
Ular Xun imperatori Atilla, birinchi mojor qiroli Almushxon – “Gʻarbdagi turklar oʻlkasi” orqali venger xalqining paydo boʻlishi tarixini turklar bilan bogʻlaydilar.
Ikki ming yillar oldin Sharqiy Yevropaning Karpat togʻlari etaklari va Dunay daryosi qirgʻoqlaridagi yaylovlarga moʻl, qut-barakaga ega hududlarga Ichki Osiyodan sak-skif, xun, keyinchalik oʻrta asrlarda bulgʻor, avar, savir, oʻgʻur, toʻqurgʻur, toʻqqiz oʻgʻuz, oʻnoʻgʻur, mojor, shekel, qabar, kun, kuman, qipchoq, bijanak kabi oʻnlab koʻchmanchi elatlar borib oʻrnashishgan va oʻz siyosiy uyushmalarini tuzishgan.
Qizigʻi shundaki, bugungi kunda ham Vengriya – Mojoristonda Kun, Nagy Kun “Ulugʻ Kun”, Kishi Kun “Kichik Kun”, Shekel, Besenyo “Pecheneg” atamalariga biror tuman yoki qishloq nomi oʻlaroq duch kelasiz.
Bu oʻlkaning yirik tumanlaridan biri boʻlmish Shekel yoki Shekeliyani koʻpchilik izlanuvchilar eski turk urugʻlaridan biri – chigil yoki izgil bilan bogʻlab tushuntiradilar.
