Маънавият ўчоқлари ҳам алдашга ўтдими, энди?
Театр - маънавий озуқа манбаи, гўзал хулқ тарғиботи маскани. Санъатнинг ушбу турига чуқур кириб бормаган бўлсам-да, лекин иштиёқи юқори бир томошабин сифатида қадрлайман.
Куни кеча, 7 февраль куни Ўзбек миллий академик драма театрида, режиссёр Асқар Холмўминов томонидан саҳналаштирилганлиги айтилган “Келди-ю кетди” номли, хажвий жанрдаги спектакль қўйилган эди.
Спектакль у эълон қилинган вақти, яъни 18.00 дан 10 дақиқага кечикиб бошланганига кўз юмиш мумкиндир, бироқ афишаларда эълон қилинган қуйидаги маълумотларга шу кунги спектакль амалда умуман мувофиқ келмаганлигига жим қарай олмадим.
Гап шунда-ки, спектакль рекламаси - афишадаги маълумотларга кўра, спектаклда жами 15 нафар ижрочилар рол ижро этишлари керак эди. Амалда эса, ҳаммаси бўлиб, 6 нафар актёр-актрисаларнинг ижросини кўрдик.
Спектакльда рол ижро этиши кўрсатилганлардан Дильноза Кубаева, Лола Элтоева ва яна бир нечта артистларни саҳнада умуман кўрмадик. Театр ходимларидан бирининг изоҳлашича эса, спектаклда уларнинг ўрнига дублёрлар саҳнага чиқарилган. Бироқ, негадир бу ҳақда на афишалардаги маълумотларга ўз вақтида тегишли ўзгартиришлар киритилган ва на спектакль бошланиши олдидан томошабин бундай ўзгариш ҳақида хабардор қилинди.
Бир томошабин, айни пайтда, истеъмолчи сифатида ҳақ-ҳуқуқим поймол қилингандек, яна ҳам ачинарлиси, алдангандек ҳис қилдим ўзимни.
Ўзбекистонда театрлар ҳам фириб ишлатиш йўлига ўтиб кетган, деган асоссиз гапларга ишонмай келганман ва ҳали ҳам ишонмоқчи эмасман, аммо ...
Келинг, қонунчиликка мурожаат қилиб кўрайлик.
“Истеъмолчиларнинг ҳуқуқларини ҳимоя қилиш тўғрисида” ги қонуннинг 6-моддасида ишлаб чиқарувчи (ижрочи, сотувчи) истеъмолчига ўзи реализация қилаётган товар (иш, хизмат)лар ҳақида ўз вақтида зарур, тўғри ва тушунарли маълумот бериши шартлиги кўрсатилган.
Қонуннинг 7-моддаси 5-хатбошида эса, шундай сўзлар бор:
“Нотўғри реклама оқибатида сотиб олинган товар (иш, хизмат) туфайли истеъмолчига етказилган зарар ишлаб чиқарувчи (ижрочи, сотувчи) томонидан тўлиқ ҳажмда қопланиши лозим.”
Бунинг устига, амалдаги Маъмурий жавобгарлик тўғрисидаги кодекснинг 178-1-моддаси 2-қисмида фуқаролар ва мансабдор шахслар томонидан нотўғри реклама берганлик учун маъмурий жавобгарлик белгиланган.
Спектакль қўйиш бу, томошабин учун хизмат кўрсатиш ҳисобланса ва у ҳақдаги афишалар реклама деб қабул қилинса, демак, мен спектакль ташкилотчилари ва унинг ижрочилари қаршисида уларнинг хизматини сотиб олган истеъмолчиман. Ижтимоий тармоқ орқали эълон қилинган ўша, мен кўрган афиша эса, рекламадир.
Балки, Миллий академик драма театридаги ушбу ҳолатга Маданият вазирлиги изоҳ берар, дейди ҳамкасбимиз Аҳмаджон Азизов.
👉 @Advokat_Abdullayev
