#отчуот
✅ Өрүс уҥуоргу нэһилиэктэргэ күөх төлөн ситимэ кэлэр буолла
СӨ экономикатын миниистирэ Петр Попов отчуоттуур бөлөх салайааччытын быһыытынан уу сахалыы дьоһуннаах отчуоту туруорда.
Ол курдук, ааспыт 2024 сылга Бырабыыталыстыба отчуоттуур мунньаҕар Үөһээ Бүлүү нэһилиэктэрин барытын хабан туран, улуустан уопсайа 170 боппуруос киирбит эбит буоллаҕына, онтон 54-дэ (32%) быһаарыллыбыт. 66 боппуруос (39%) билиҥҥи кэмҥэ, үгүс үбү эрэйэр буолан, хас эмэ сылга анаммыт үлэ буоларын да быһыытынан, үлэҕэ сылдьарын, оттон 50 боппуруос туолбата диэн бэлиэтэммитин иһитиннэрдэ.
Өрүс уҥуоргу нэһилиэктэргэ газ алларааҥы утаҕыттан ылан, ситим аан бастаан өрүс уҥуор тардыллыаҕа.
1-кы түһүмэххэ Хоро, Дүллүкү, Хомустаах нэһилиэктэригэр 2026-29 с.с. күөх төлөн киирэрэ чуолкай билиннэ, үбүлээһинэ быһаарылынна.
Өрөспүүбүлүкэттэн уонна федеральнай үбүлээһини таһынан олохтоох бюджеттан үп көрүллүөҕэ. Ону тэҥэ "Сахатранснефтегаз" тэрилтэтэ кыттыһыаҕа. Итиэннэ нэһилиэктэр истэригэр тардыллар ситим үбүлээһинин "Газпром" тэрилтэтин нөҥүө ыытыллыаҕа.
Бу туһунан СӨ Ил Дархана Айсен Николаев 10 млрд суумалаах газтааһын боппуруоһун быһаарар дьаһалга илии баттаата.
Иккис түһүмэх 2028-30 сс ыытыллыаҕа. Бу кэм устата магистральтан Мэйик, Далыр, Кыракый нэһилиэктэрэ газтаныахтара.
Оттон Көтөрдөөх, Боотулуу уонна Сургуулук нэһилиэктэрэ үһүс түһүмэххэ ыытыллар үлэҕэ хабыллыахтара. Онон 2031 с. бу тыа сирин түөлбэлэригэр күөх төлөн киириэҕэ.
Төрдүс түһүмэҕинэн газ ситимэ Ньурба улууһугар тиийэрдии тардыллыаҕа. Оччотугар бу ситимҥэ ыытыллар үлэ былааныгар Оҥхой нэһилиэгэ киллэриллиэҕэ.
@ueheebuluu
@ulusmedia
