O‘zbekiston Kinematografiya agentligi buyurtmasiga ko‘ra “Buyuk bobolarim bolaligi” ruknida ishlab chiqarilayotgan 3D formatdagi ushbu animasion film yosh tomoshabinlarni buyuk ajdodlarga munosib voris bo‘lib voyaga yetishlarida muhim ahamiyatga ega.
Geografiya, matematika, astronomiya, mineralogiya, geodeziya, falsafa kabi bir qator fanlarga oid ko‘plab fundamental asar, traktat va qo‘llanmalar yaratgan Abu Rayhon Beruniy bolaligida onasi bilan o‘tinchilik orqasidan kun ko‘radi. Bir kuni u bozorda o‘tinlarini sotib bo‘lgach Mansur ismli kishini uchratadi. Mansurning qo‘lida usturlob bor edi. U usturlobni sotmoqchi. Ammo Abu Rayhon buni ishlatishni bilmasligini aytadi. Shunda Mansur unga usturlobni qanday ishlatish kerakligini o‘rgatadi.
Abu Rayhon bir kuni rangli tosh topib oladi. Uni sotish uchun bozordagi hind savdogarining oldiga boradi. Ammo hind savdogar uni oddiy tosh deb sotib olmaydi. Hind savdogar unga bir kitob beradi. Boshqa kuni u xitoylik savdogardan Chin-mochin haqida ma’lumot oladi. Keyingi bozor kuni Abu Rayhon sayohdan Andalusiya haqida so‘raydi. So‘rab-so‘rab, o‘rgangan olim deganlariday, Abu Rayhon bilganlarini kitoblardagi ma’lumotlar bilan solishtiradi, taqqoslaydi va o‘zi shu vaqtgacha o‘qigan yer haqidagi asarlarda: “Yerning yarmi ko‘rsatilmagan, toshlar haqidagi kitobda yarim toshlar yo‘q”ligini fahmlaydi. Shunda ustoz Mansur unga: “Bu kitoblarni bir kun kelib sen to‘ldirasan-da, endi”, deydi.
Darhaqiqat, Abu Rayhon Beruniy qiyinchiliklarga qaramay o‘qiydi, o‘rganadi va barcha zamonlarning eng buyuk olimi bo‘lib yetishadi. U yuzdan ortiq ilmiy asarlar yozadi. Yer sharining tuzilmaviy xaritasini yaratadi.
@uzasa_uz
