حياش الناس والهزوة
موضوع للحوار ..
نستغرب في اللي يتعاملو على إنهم غير..
حياشهم غير .. نسبهم غير ..
صغارهم غير .. نظافتهم غير .. وماكلتهم غير .. وتربيتهم غير .. ومتخيلين انهم إستثناء وانهم ديما في خير ..
نتكلم بالتحديد ( عالناس الهزاية )
في كل حوش في حاجة ناقصة وقلة راحة في نقطة معينة ..
لكن الرضا والصبر هما اللي يمشوا في الحياة ..
النقص وقلة الراحة متوزعة على حياشنا …
الحوش اللي مافيشي موت وفقد ،فيه مريض ..
وفي حوش فيه مراهق مدهش اماليه، وفي الطايش اللي مشهدر بأهله ..
وفي ديار تبكي فيها المطلقة وماحدش يندري عليها …
وناس عندهم أرملة تجري وماتدري على صغارها ..
وفي البو الواعر وفي البو اللي مايصلحش وفي البو اللي مهناش أصلاً..
وفي الام اللي تفرق في المعاملة وفي الام القاسية
وفي الام الظالمة وفي الام المظلومة
وفي الخوت اللي مايرحموش وفي الخوات المضطهدات
وفي الخوت اللي وضعهم سيء لا خدمة لا قدمة وحالهم يبكي
كل باب وراه سر .. وكل حوش فيه ابتلاء شكل
لان حياشنا حياش دنيا ..حياش مؤقتة ولو كانت ملك ..
لان المستقر في الجنة 🤍..
لذلك لما تسمعي مشكلة عن فلانة والا العيلة الفولانية صارلهم شي ..
ردي بالك منها النفخة هاديكا بتع احني ماعندناش هكي واحني خير منهم ..
و لو بتقارني روحك بغيرك تلقي حالك انتي اللي يبكي
ردي بالك تتخيلي روحك في معزل والا ربي مدايرك دون الناس ..
وراهي الناس تحس !!
تحس بشبحاتك لمناديرهم وتقعميزتك اللي مش مرتاحة
وطاستك الي ماكملتيهاش تأففاً .. وجيتك اللي فوق من النفس
لذلك تواضعي واغلبيها النفس الدنيئة اللي واهماتك انك احسن من غيرك ..
وراهو في فرق بين صالح ومستور ..و بين الفلوس لما تبدأ رزق أو ابتلاء ..
وراك تراب يمشي على تراب حوشك وعيلتك وصغارك وفلوسك وجمالك وكل شي عندك فاني ..فردي بالك
تواضعو لما تخشوا حياش غيركم
خشوا حياش الناس غاضين البصر
وقبل ما تعفسوا عتبتهم نظفوا قلوبكم واطفوه جهاز التقييم اللي يخدم اربعة وعشرين ساعة .. تقول رقابة
لستم مكلفين بكتابة أعمال غيركم في صحائفهم ولا فتح أبواب الجنة اتقوا الله يامعشر النساء فإننا اكثر أهل النار
خشوا للناس باش توسعوا الخاطر وتقولوا الكلمة الباهية وتخلو اثر طيب وراكم .🤍
