كدي تعالو نشوف قصه يوم بكره دا
ح تقولو لي : عارفين وبتاع وننننننن.
ح اقول ليكم : تعرفو تاني ، الفي شنو والماف شنو ؟
أول شي اجدع الدبدوب الشايلو في يدك دا ، ولو ماشي مكان ورد عشان تشتري ورده حمراء.. ابرد شوية لحدي ما نكمل ليك القصة ، دسيس؟
عيد الحب..
أو الفالنتاين داي..
أو عيد عديمين الترباية..
كلو ماشي ، المهم هو مفروض بكرة!
طيب ليه بكرة بالذات ؟
إشمعنا يوم 14 فبراير ؟
ليه ما نحتفل بيهو الليله أو بعد بكره مثلًا ؟!..
اوريكم ليه؟
طبعًا عشان نرد على سؤال " ليه " ح اجيب ليك كذا رواية ، لأنو الروايات اختلفت حول هذا الأمر..
ف أول رواية معانا بتقول إنو كان في قس اسمو سانت فالنتاين ، اها سانت دا كان بخدم في الكنيسة الكاثوليكية خلال القرن الثالث في روما الإيطالية..
وقتها الإمبراطور كلوديس الثاني كان حاظر الزواج على جنوده ، يعني كلامو دا لو نزلت vpn ذاتو ما ح تقدر تكسرو لأنو هو الإمبراطور وكان شايف إنو حنك الزواج دا ح يعطل الجنود ديل ، وبما إنو ما عندهم زوجات ولا أطفال ف حيكون كل تركيزهم على الأمور العسكرية وبس ، عشان كدا قال ليهم: زواج نوووو!!.
يقوم عمك فالنتاين يقول : تطلق أم بخيته لو ما عرست للجنود ديل ، وزواج في السر كمان عشان تبقى ميته وخراب ديار..
ولأنو لكل جواد كبوة ؛ الإمبراطور اكتشف الحوار دا وتم القبض على الأخ فالنتاين وحُكِم عليه بالإعدام حتى الموت ، ونُفِّذ الأمر بتاريخ 14 فبراير 269م.
دي كدا الرواية الأولى..
ولكن ناس الرواية التانية قالو : هئه! دا ما الحصل.
طيب الحصل شنو يخوانا ؟
قال ليكم : اي هو صح قتلوه واي حاجة لكن ما بسبب تزويجه للجنود في السر..
السبب إنو فالنتاين دا هرّب مساجين مسيحيين من السجون الرومانية ولذلك تم إعدامه..
ناس الرواية دي شايفين إنو حركتو العملها دي لا تخلو من الحب ، ومنها نتج عيد الحب..
ناس الرواية التالتة قالو : اي الحوار فيهو سجن وأي حاجة ، لكن القس بذات نفسو كان في السجن دا ، ووقع في غرامِ ابنة السجّان ، وبدأ يرسل ليها رسائل حب..
#وقفه_صغيرونه..
الراجل دا يعتبر أول زول في التاريخ فتح حوار رسائل الحب دا ، أول واحد رسل رساله حب وبعدها قلة الأدب ما تديك الدرب..
#نرجع_لموضوعنا
المهم هو كان برسل لي بت السجان رسائل حب ، وبالمقابل هي كانت بتتعمّد تزوره في السجن..
وقبل ما يموت رسل ليها رسالة ووقّعها بـ from your valentine ، ودي عباره شغاله لحدي هسي في رسائل عيد الحب..
ف بس الجماعة ديلك بقو يحتفلو باليوم دا " 14 فبراير " من كل سنة ، تخليدًا لذكرى القس سانت فالنتاين..
هم كدا كدا حيولعوا في جهنم..
إنت بقى يا سيّد ليه بتحتفل معاهم وتضايقهم في جهنمهم ؟
ارمي الدبدوب يا سيّد!
ارمي الدبدوب واكسر حنك مشوار الورده وخُت قريشاتك في جيبك بنفعوك في اليوم الأسود
