Həzrət Zeynəb (s): Haqqın Elmi Sancaqdarı
Tarixin səhifələrinə baxdıqda görürük ki, bəzi şəxsiyyətlər zamanın çərçivəsinə sığmır, onların varlığı bir dövrə, bir məkana məhdudlaşmır. Bu şəxsiyyətlərdən biri də Həzrət Zeynəbdir (s). O, yalnız bir bacı, bir qız, bir ana deyil – o, elmin qoruyucusu, haqqın carçısı, vilayətin müdafiəçisidir.
Həzrət Zeynəb (s) elmin dərinliyində qərq olmuşdu, lakin bu elm yalnız nəzəri bir biliyə çevrilmədi. O, öyrəndiklərini yaşadı, haqqı müdafiə etmək üçün bildiklərindən bir zireh kimi istifadə etdi. Onun elmi nə bir məktəbdə oxumaqla, nə də ustadlardan öyrənməklə qazanılmışdı. O, elmi ilahi bir hədiyyə kimi aldı, çünki o, Peyğəmbər (s) məktəbində böyümüş, Əli (ə) hikmətinin kölgəsində tərbiyə almış, Fatimənin (s) ismətinin aynası olmuşdu.
Elmi Rəhbərliyin Zirvəsində Bir Qadın
Bəzən cəmiyyət elmi rəhbərliyi yalnız kişilərin yükü sanır, lakin tarixi dəyişdirən qüvvələr arasında qadınların izləri silinməzdir. Həzrət Zeynəb (s), yalnız bir alim deyildi – o, elm ilə şücaəti, hikmət ilə izzəti birləşdirən bir xanım idi. O, Kufənin meydanlarında, Yezidin sarayında sözünün qılıncı ilə batil ordularını diz çökdürən, haqdan üz çevirənləri titrədən bir natiq idi.
Onun sözü, dərin elmi və ilahi idrakı ilə ruhlara işıq saçırdı. O, Qurandan danışarkən sanki ayələr canlanır, haqq aydınlanırdı. İmam Səccadın (ə) ona "Sən, öyrədilmədən alim, anlatılmadan anlayan birisən" deməsi, onun vilayət elminin xəzinədarı olduğunu sübut edirdi.
Elm Yalnız Bilik Deyil, Aşiqanə Bir Yaşayışdır
Həzrət Zeynəbin (s) elmi yalnız nəzəri müzakirələrdə qalmadı. O, elmi, həqiqətin müdafiəsi üçün bir silah, bir çıraq, bir yol olaraq yaşadı. Kərbəla hadisəsi baş verəndə o, bir müdrik kimi hadisələri yalnız izah etmədi, bir inqilabçı kimi onu yönləndirdi. O, Kufənin bazarlarında, Şamın zalımlar qarşısında, vilayət yolunu aydınladan bir çıraq oldu.
Onun xütbələri təkcə imamət məktəbinin elmi dəlillərini çatdırmırdı, həm də bir əqidə, bir ruh, bir dirəniş üslubu idi. O, elmlə bəşəriyyəti oyatdı, cəsarətlə tarixi dəyişdi.
Qadının Məsuliyyəti: Vilayət Elmini Yaşatmaq
Həzrət Zeynəbin (s) yolu, hər bir qadın üçün bir dərsdir. Elm yalnız oxumaq, yazmaq deyil – elm vilayət yolunda bir mövqe tutmaqdır. O gün Kufədə bir qadın batilin qarşısında dayandı, bəs bu gün biz haradayıq? O, haqqın müdafiəsi üçün danışdı, biz hansı səsləri ucaldırıq?
Bu gün də dünyada zülm var, haqq unudulur, vilayətə qarşı çıxanlar meydandadır. Əgər Zeynəbin (s) məktəbini dərk etsək, biz də öz dövrümüzün Kufəsində, öz zamanımızın Yezidlərinin qarşısında durub haqqı elan edə bilərik. Çünki elm, yaşanmadıqda yalnız bir yüktür, lakin yaşandıqda bir inqilaba çevrilir.
Həzrət Zeynəbin (s) həyatı sübut edir ki, qadınlar tarixdə yalnız müşahidəçi deyil, tarix yaradanlardır. O, bizə göstərdi ki, bir qadın elmi ilə cəmiyyəti oyada bilər, sözü ilə bir dövləti silkələyə bilər və inancı ilə batilin iç üzünü ifşa edə bilər.
Son Söz: Haqqın Elmi Varisləri Olmaq
Həzrət Zeynəb (s) elmin, şücaətin və vilayətə sadiqliyin simvoludur. Onun yolu yalnız bir tarix səhifəsi deyil, müsəlman qadınlarının yaşaması gərəkən bir mövqedir. Bugünkü dünya, yeni Kufələr, yeni Yezidlər, yeni zülm səhnələri ilə doludur. Sual budur: biz hansı tərəfdəyik?
Əgər biz Zeynəbin (s) elmini dərk etsək, onun məktəbini yaşasaq, haqqın müdafiəsi üçün susmasaq, onda bu elmin haqqını vermiş olarıq. Çünki haqqın elmi, yalnız kitablar arasında qaldıqda sönər, ancaq yaşayan qəlblərdə əbədi yanar.
Ə.Hüseynova
(Fəlsəfə və Kəlam qrupunun Hz.Zeynəb haqqında keçirilən elmi konfrasından qısa qeyd)
@farz313
