شد الرحال من الحشا ماعاد لك فالصدر زاد
يكفي طعون البارحه اللي ماتشافت فجسدي
قفلت بيبان السهر ما عاد ابي غير الرقاد
اليا متى وانا اتبعك مثل الظلام السرمدي
لا صار حبك ما وراه الا المكابر والعناد
انا ترى ماني على طرد المقفيّن محدي
الشاعر اللي هام بك يقدر يهيم فـكل واد
مير انت لاعرضتك فجوج الخلا وين تغدي
جيتك و انا جرحي ندي ولا بغيت إلا الضماد
ولا دريت ان الضماد اقسى من الجرح الندي
جيتك عشان اعشق بشر مهب عشان اعشق جماد
جيتك عشان انهي معك حزني مهب جيت ابتدي
دورت فـ ضلوعك دفا ولا لقيت الا الرماد
صدرك مثل ليل الشتاء واللي ورا الحدب بردي
على بياضك ما لقيت فـ خافقك غير السواد
وعلى فياضك ما رويت الا السراب الجرهدي
لو كان في وجهك حيا ماترخص آيام الوداد
ماتدري ان العمر يقفي وان الآيام تعدي
ماهو وكاد انك تخاف مفارقي مير الوكاد
ان الردي مهما عملت يرد للطبع الردي
يمكن يحننك الجفا يمكن يجننك البعاد
لكن تتوب من اللعانه والعناد اقطع يدي
انا اكثر انسان اجودي وقف معاك فـ هلبلاد
وانت اكثر انسانً غدرت فصدق رجال اجودي
يوم اعتبرت ان العلاقه بيننا كبوة جواد
انا اعتبرت الليله اللي جابتك يوم سعدي
وانا اعتبرتك سيدي يوم الغلا فالصدر ساد
ولا انت حتى منت كفو اقولك ياسيدي
لو كنت للخير مهدي كان التعب وياك فاد
لكن تعبت فـ واحدً ما هو على الخير مهدي
اللي حصل من تحت راس محبتك كفى وزاد
أجهدت مير المشكله ما فاد وياك جهدي
كنت اعشقك على البساط الاحمدي والعشق باد
وليا تركتك بتركك على البساط الاحمدي
ودامك على نفس الطريق السرمدي غاوي طراد
والله لأصير أبعد عليك من الثريا و الجدي
وان كان لك صبرً مدي يقوى على ليل الهجاد
انا ترى ماعاد لي صبرً على صبرك مدي
يعني اذا كنت محدي على المكابر والعناد
انا بعد ماني على طرد المقفين محدي .
