@ZabarjadMedia erta-indinlarga rasman e'lon qiladi. Tarjimon sifatida sal avval aytib qoʻya qolay, Jaloliddin Rumiyning "Ichindagi ichindadir" kitobi nashrdan chiqdi. Mening tarjimamda!
Hajman oʻrtacha boʻlsa-da, ustida eng uzoq ishlagan kitobim shu boʻldi. Asarning yetmishdan ortiq nusxasi yetib kelgan. Shulardan eng toʻliq hisoblanadigan uchtasini tanlab, tahlil qildim. Bu yaxlit asar sifatida yozilmagani, Rumiyning suhbatlaridan tarkib topgani bois strukturasi ancha murakkab, har bir oyat, har bir hadis, har bir shaxs, har bir rivoyatni boshqa manbalardan ham oʻrgandim, oʻquvchining mutolaasini osonlashtiradigan izohlar berdim. Bob ichidagi qismlarni alohida ajratdim. Qurʼoni Karim oyatlari arabchasi bilan solishtirildi, matnning asliyati ham keltirib oʻtildi.
Xullas, juda katta mehnat ketdi bu kitobga. Diniy-didaktik fon berilgan sayoz asarlarni tanqid qilganimda islomofoblikda ayblab qolishardi. Shu yoʻnalishdagi fundamental asarlardan birini tarjima qildim. Endi olib oʻqimasangiz boʻlmaydi.
