⚜Бүгүн - Нам улууһа тэриллибитэ 95 сыла
Намылыйар налыы сыһыылардаах, талыы талба хонуулардаах, эҥсилгэннээх Эҥсиэли хочото, Нам улууһа олунньу 10 күнүгэр 1930 сыллаахха тэриллибитэ.
Биһиги улууспут баай историятынан, үлэни-үөрэҕи өрө туппут, дэгиттэр талааннаах үтүө дьонунан, кэскиллээх кэнчээри ыччатынан, биллиилээх олоҥхоһуттарынан киэҥник биллэр-көстөр.
Улууспут сүрүн хайысхата – тыа хаһаайыстыбата. Сыспай сиэллээҕи, хороҕор муостааҕы сыһыы-хонуу муҥунан тэнитэргэ дьулуһабыт.
Биһиги киэн туттабыт Сахабыт сирин төрүттэниитигэр кылааттарын киллэрбит, норуоттарын туһугар олохторун толук уурбут дьоммутунан Максим Кирович Аммосов уонна Илья Егорович Винокуров үтүө, сырдык ааттарынан.
Күндү биир дойдулаахтарбыт! Улууспут төрүттэммит күнүнэн итиитик-истиҥник эҕэрдэлиибит! Төрөөбүт түөлбэбит туһугар үлэлиэххэ-хамсыахха, айыахха-тутуохха, Нам улууһун аата республикаҕа, дойдуга, аан дойдуга аатыра туруохтун!
@gazetaensieli
